ضاقت وقلنا ماتضيق الوسيعه=ضاقت وقلنا الله وميسر الحال
ضاقت بوجه اللي يدور ربيعه=وياشينها لاضاقت بوجه رجال
أنا ماقول أني كرهت الطبيعه= لكن ماهي دايم على كل الأحوال
والله يالو العز نقدر نبيعه= كان اليدين القفر دبت بالاموال
لكن تبي تبقى الرفيعه رفيعه= عمر المذله منجبت عز ورجال
أبوي قال أقرا كتاب الشريعه= تلقى تفاصيلٍ بها أقوال وأفعال
واليا قريته أطلب اللي نطيعه =أنه يسهل دربك اقفاي واقبال
يالله ياوالي النفوس الوديعه=أنك تعدل ميله الوقت لامال
هذا طفل توه على أول ربيعه=توه صغير وعاش في جيل جهّال
لكن طفل تستغربه من صنيعه=الوقت نساه الطفوله والأطفال
كنه معاصر حرب يوم الوديعه= وهو قبل عامين مايلبس عقال
مالك بطول الهرج بس الفجيعه=اللي تقفو دربه رخوم وأنذال
لا ماحسبنا للنفوس الوضيعه=ولاتركنها على حساب الأقوال
ياوجد قلب درعم الشوق ريعه =على هنوفٍ تو ماحطت الشال
الناس تزهمها مطيعه مطيعه = وأنا عجزت ألقى على البنت مدخال
مدري ولكن ما قدرت أستطيعه= أني عرفت أن أعقل القوم دجّال
هذا أبو بكره وذا أبو تبيعه= والله عليمٍ بالنوايا والأعمال
وأنا اليا ضاقت علي الوسيعه= ماقول غير الله وميسر الحال
إما تجي ونقول عقب القطيعه = زان المكان بفال من طيّب الفال
والإ تموت وينكتب لشجيعه= ماتت على رجم الأمل روح رجّال