عذري خطأ ..دام المحبـه خطايـه=يامن قسيتي..قسوة الخوف والجوع
الحـب مـن رب المخالييـق آيــه=الحب نور من سمـاء الله منـزوع
الحب عندي نزف..ماهـو هوايـه=الحب فوق الكم.. والكيف..والنـوع
الحـب.. ياحبـي وليـد الهدايـه=الحب وعد بمهجة الفجـر مـزروع
وقلبي طفل ..غاوي..عديم الدرايـه=يطرد عصافير البراءه بـلا طـوع
خـذاه حبـك وانتهـى بالبـدايـه=ونا اغتربت ولا بقا ..ود ..وربـوع
تكفين من شحن العواطـف كفايـه=الثرثره في نظـرة عيونـك تلـوع
كفى عتب عاقل ..على قلـب تايـه=عنه العتب ..ياربة الحسن ..مرفوع
ودي ..ابوح ..بلوعتي ..وبشقايـه=الصمت بايامي سفر غير مشـروع
وان صرت بأفواه العـواذل حكايـه=فالزين خافي صوت والشين مسموع
الله كتـب للـحـب ذل الوصـايـه=في مجتمع عن حلو الاحلام ممنوع
لو نشتكي ..ما للمشاعـر حمايـه=كم ذبلت ورود وكم طفيت شمـوع
ونفس البدايه ..هي حديث النهايـه=بدموع حبيتك ..وأ ودعك بدمـوع