رح نزل جزئين مع إنه ما في تشجيع.
الجزء الثاني ...



====================================


ثاني يوم في مدرسة خليفة
الاستاذ: اي خدمة ؟؟
خلف: انا والد الطالب خليفة خلف
الاستاذ: هو في اي صف؟؟
خلف: امممم .... يمكن ...
عيسى من ورى خلف: في صف اول ابتدائي /5
الاستاذ: ايوااا عرفته ... ده ولد شاطر قوويي ... تفضلوا من هنا ..

خلف: عيسى شو يابك هني؟؟
عيسى: الشي إلي يابك ... السيارة ... مب معقوله ايي مشي هني
خلف: عن الاستهبال.. ليش ييت ؟؟
عيسى: ييت عشان خاطر خليفة
خلف يطالع عيسى بنظرات غضب وعيسى يبتسم في ويهه ويقعد على الكرسي..

بدأت الحفلة وكل صف قدم فقرته ... واخيرا هذا دور صف خليفة .. قال الاستاذ: انا كاتب اكثر من سؤال وحاطنهم في هالعلبة وكل طالبة يسحب سؤال ويجاوب عليه
كان سؤال خليفه هو : من هو الشخص الذي تتمنى ان تصبح مثله في المستقبل؟؟

خليفة: الشخص إلي اتمنى اني اكون مثله هو : شخص عاادي وبسيط لاهو حاكم ولا امبراطور .. شخص يحب الخير لكل الناس شخص اذا ابتسم ببابتسامته يفرح قلوب ملايين البشر ... وفوق هذا هو شخص مبدع ... طيب ... حنون .. شخص ذو مهنه انسانية .. هو عمي الغالي والعزيز عمي عيسى
وابتسم خليفة ابتسامة ساحرة تشرح قلب كل انسان ...

كل الحضور اعجبوا بشخصية خليفة وجرئته واختياره الرائع إلا شخص واحد كانت نار الحقد والغضب تحرق قلبه ... حس ان تربيته كلها تبخرت في الهوا .. وإن كل إلي غرساه في نفس خليفة راح وضاع ... طلع من قاعة الاحتفال وراح بيته وقعد في حجرة خليفة ينتظره متى بيرجع ..

بعد ما خلصت الحفلة رجع خليفة البيت وكان مستانس لأنه عبر عن إلي في قلبه وارتاح... لكنه ما كان يدري شو إلي ينتظره في البيت

دخل خليفة حجرته شاف ابوه يالس على الكرسي وكان معصب ... خاف في البداية لكنه استجمع قواه وسلم على ابوه ..

خلف: لك ويه تسلم علي عقب إلي قلتله اليوم؟؟
خليفة: يبه انا ..
خلف: وحطبه .. انت شو ؟؟ عندك شي ثاني تقوله غير إلي قلته اليوم ... فشلتني و نزلت راسي .. فضحتني جدام الناس بكلامك يالرقيق ... مستوي مرهف الاحساس ..

ونزل عقاله وضرب خليفة ضرب ... ضرباه بلا رحمة وحبساه في الغرفة وقفل عليه الباب ... تم خليفة يصيح ويترجى ابوه انه يطلعه لكن بدون فايدة واشوي رن التلفون إلي في غرفة خليفة

خليفة: الوو ..
عيسى: هلا .. هلا والله بالغالي ... شحالك ؟؟
خليفة: عمي الحق علي ... انا ما بتم هني تعال ارجوك .. ( وتم يصيح)
عيسى: شوو ؟؟ ... دقيقة واكون عندك ..

ركب عيسى السيارة .. وساقها مثل المينون وكان صوت خليفة يتردد في اذنه ... وصل عيسى بيت خلف فتح الباب وتم يصارخ : خليفة ... خليفة ..

طلعت ام خليفة: ههيي انت ... وين عايش ؟؟ خفض صوتك توني مرقدة عبد الله ما فيني ينش مرة ثانية ..
عيسى: وين خليفة؟؟
ام خليفة: في حجرته ... وين بيكون يعني ؟؟
عيسى: شو سويتوا فيه ؟؟
ام خليفة: تقصد هو شو سوى فينا ..
عيسى : الكلام وياج عقيم وما منه فايدة.. قومي من جدامي

وطلع بسرعة وحاول انه يفتح باب حجرة خليفة لكن للأسف الباب كان مقفل بالقفل

عيسى: ماشي إلا اني اكسر الباب ... خلوف ابعد من عند الباب ..

وبعد ثلاث محاولات كسر عيسى الباب ودش الحجرة وشاف خليفة ممدد على شبريته وكان تعبااااااااان ..

عيسى: حبيبي خلوف شو سووا فيك ؟؟!!
وشلاه ووداه المستشفى ...
* * * *

الجز الثالث ...

==================================

عيسى: يبه لازم نشوف لنا حل
ابو خلف: حل ؟؟ لشوو ؟؟
عيسى: يبه .. تصرفات خلف محد يقدر يتحملها ..
ابو خلف: هيه والله ... شو نسوي له ... ياما نصحته وقلت له بس هو الله يهداه ما يسمع
عيسى: يبه ... هذا ولدك واكييد اذا انت قلت له شي بيسمعه ... فهمه هذا ولده مب من الشارع .. ولده من صلبه ..
ابو خلف: انا صوتي راح من كثر ما اقوله ... بس تعرف اخوك
عيسى : خلاص انا بتفاهم وياه ..

ويتصل عيسى عند خلف ...

عيسى: الوو
خلف: افففف ... شعندك انت بعد ؟؟ ... ما تعرف ان الناس في هذا الوقت يرقدون
عيسى: لا ما اعرف ...
خلف: شو تبا ؟؟ تكلم بسرعة ..
عيسى: ليش ضربت خليفة؟؟
خلف: كيفي ولدي وانا حر ...
عيسى: لا مب كيفك ... شو انا حر ؟؟ وين نحن
خلف: عيسى انامب متفيج الحين ..
عيسى: شو مب متفيج ... لعبه هي ... تقول وتكفخ ولدك ؟؟ وين عايشين نحن في العصر الحجري؟؟
خلف: انت الظاهر ما عندك سالفة وانا نعسااان وابي ارقد ... مع السلامة

وقفل في ويهه عيسى ... زعل عيسى من تصرف خلف ... بس تذكر ان خليفة راقد بروحه في الحجرة قال: خلني اسير واتطمن عليه احسن لي ..

في حجرة عيسى....

عيسى يالس عند خليفة ويقول: حبيبي ... شو سووا فيك ... ليت انا مكانك ... يصيبني ولا يصيبك .. حبيبي انت ..
اشوي ... ينش خليفة ويقول: عمي ؟؟
عيسى: عمري ... آمر ؟؟
خليفة: عمي انا عطشان ابي اشرب ماي ..
عيسى: ثانية بس والماي بيكون عندك ..
خليفة بعد ما شرب الماي ... قال: عمي
عيسى: هلا ..
خليفة: عمي انا ابي اتم عندك ... ما ابي ارد البيت
عيسى: لييش؟؟
خليفة: محد يحبني هناك .. ليش اسير لمكان انا واثق انه محد يحبني فيه ... واترك المكان إلي احس فيه بالراحة
عيسى: لا تقول جذي ... ماشي اهل ما يحبون عيالهم ..
خليفة: لا يا عمي شيي ... ابوي وامي ... يكرهوني ويحبون اخوي عبد الله اكثر مني ... دوهم يقولون انه بيكون احسن مني.. انا يوم اقول جذي هذا مب معناه اني اكرهه اخوي او اني احقد عليه لا بالعكس انا احبه بس هم ما يحبوني..
عيسى: خلوف ماشي اهل ما يحبون عيالهم ... لا تقول جذي ..

خليفة: عمي .. انت تقول جذي لأنك في عمرك ما حسيت بالاحساس إلي انا احسه .. يدي سيف ما قصر وياكم يعني جوف انت الحين كم عمرك ... 20 سنة .. وبعده يحضنك ويبوسك بعد ... وانا عمري 6 سنوات وابوي ما ابتسم في ويهي ولا مرة !!!!

عيسى: خلوفي ... ابوك غير ما يحب انه يظهر مشاعره لأحد
خليفة: بس انا مب اي احد ... انا ولده
عيسى: وانا اخوه ... في عمره ماقالي كلمة حلوة ولا ابتسم لي ... يا يبه هونها وتهون .. انا موجود واعمامك اله يخليهم ويدك ويدتك ... كلنا هني وان شاء الله بنعوضك عن الحنان

خليفة وهو يحضن عمه: الله يخليكم لي ياعمي ..
عيسى يبتسم ويمسح على راس خليفة .....
* * *

اسبوعين مروا من ذاك اليوم ... وخلف ما سأل عن ولد ... وخليفة بعده في بيت يده .. كانوا كلهم يالسين في الصالة ويتسولفون ..

ام خلف: عيسى ... متى ان شاء الله بتفارقنا ؟؟
عيسى: شوووو ؟؟؟
ام خلف: يعني متى بتشد حيلك وبتخلينا نخطب لك ؟؟
عيسى: لاااا ... شووو تخطبون لي ... لا لا لا
ام خلف: شو لا لا لا ؟؟
عيسى: يمه حرام عليج ... تبين تدفنين زهرة شبابي
ام خلف: اي زهرة شباب ... استحي ع ويهك ... مستوي اطول عن ابوك .. واعرض عنه وبعدك تقول زهرة شبابك ؟؟
عيسى: ههههههه
ام خلف: وبعدين كل ربعك إلي في عمرك عرسوا وعندهم عيال الحين ما بقى إلا انت
عيسى: يمه كل إلأي عرسوا عندهم خلل ... او شي في عقولهم
ام خلف: محد فيه خلل في عقله إلا انت
عيسى: حرام عليج يمه .. تقولين جذي لولدج الوحيد
ام خلف: اي وحييد ... استح ع ويهك وباجي خوانك وخواتك شو سويت فيهم ؟؟
عيسى: ماشي... تبريت منهم بس..
ام خلف: قم من جدامي
عيسى يضحك وكلهم يضحكون ... واشوي يسمعون صوت احد يدق الباب ..

ابو خلف: عيسووه ... قم وفج الباب.
عيسى: ان شااااااا الله ... محد غيري في هالبيت ..
ام خلف: هيه مب انت ولدي الوحيد ... ما عندنا عيال غيرك
عيسى: لا خلاص هونت مب الوحيد .... مب الوحييييد

ويفتح عيسى الباب ويلاقي خلف ...


=======