صعبه اعيش ايـام عمـري بليـاك
وانت الحياة بـدون شوفـك كآبـه
تعال خذنـي لاخـر حـدود دنيـاك
مليت اقاسي من زمانـي عذابـه !!
حاولت لكـن مـا تحملـت فرقـاك
بُعدك عذاب وفي حضورك مهابه !!
للشوق فيني شي لا ماعتقـد جـاك
حـوّل حياتـي للملـل والرتـابـه
أوقات اشوف ان الغلا مـا تعـداك
واحيان احس ان الهوى للغلابـه !!
بين المحال وبيـن خافـي نوايـاك
حار السؤال ولا لقيـت الاجابـة !!
كانك تقـول همـوم وقتـك تقفـاك
وش حيلة اللي صار همـه زهابـه
يطرد سرابك في متاهـات رجـواك
نفس الطريق اللي مشيتـه مشابـه
قلب ٍ يحبك كيـف يسـلا وينسـاك
ماللفضاء لو شفت دونـك رحابـه
خليتني عايـش علـى حـد الادراك
مثل الجريح اللي تمـادى صوابـه
ماحد ٍ ملأ عيني من الناس لـولاك
فـي غيبتـك كـل الاوادم تشابـه
هذا الشعور اللي من اقصاي ينخاك
يبي القليل ومـا عطيتـه رضابـه
كل القصايد داخلي همهـا ارضـاك
حبـك مـدادي لا بغيـت الكتابـه
أجيـك كلـي يـوم كلـي فدايـاك
كلش يهـون الا الحبيـب وغيابـه
رد الوفـاء والحـب للـي تمنـاك
قفّى العمر واحلـى ليالـي شبابـه
جاتك مشاعر مالها غيـر شـرواك
دامك ملكت الروح وين الغرابه .. !!
مع تحيااتي : لحن العمر
صعبة اعيش ايام عمري بلياك .... 
العرض العادي
