من يستحي هالوقت وآآآعزتي له
مادمت تنشد يا رفيقي عن الحال ... مالي على كتمانها عنك حيله
الصبر عن بوح الاحاسيس قتال ... والبوح في بعض المواقف فشيله
لو كل مايطري على البال ينقال ... ماكنت احس ان الثقيله ثقيله
ابطيت اكافح ضيقة البال بالبال ... وادفع بلى هاجوسها كل ليله
لين اقبلت مثل السحابه بهمال ... تشفي غليل اللي تزياد غليله
رعادها خيل تدابك وتختال ... وبراقها لمع السيوف الصقيله
طاحت ولا اوفق من حناياك منزال ... وسع فضا صدرك لفيض المخيله
يابدر ماني عال لو صحتي عال ... شفني من الصدمات نفسي عليله
اشيل حمل(ن) لو يشيلنه جبال ... الله وامانه غير تصبح نثيله
ارمي من هموم الزمن واسحب ادبال ... وانزل عن الجوكر وغيري يشيله
من كثر ماشفت بحياتي من انذال ... بديت اشك ان النذاله فضيله
ماطاح من عيني رجل طاحوا رجال ... ورجال يا ابن حنيف ماهي قليله
اقرب من اللي قالهم ضمن ماقال ... راكان بن حثلين راعي الجزيله
هذا ولد عم(ن) وهذا ولد خال ... وهذا صديق(ن) ماندور بديله
سبحان منهو يابدر بدل الحال ... وحط الجفا بين الخليل وخليله
هذا الزمان يبغاله لسان دلال
من يستحي هالوقت واعزتي له
وقت(ن) به الراعي غدى راعي دلال ... كل(ن) على طاريه ينفض شليله
من كان ساسه للردى مضرب امثال ... اليوم يحسب من كبار القبيله
المال يا ابن حنيف ملعون ابو المال ... ذل العزيز وعز ناس(ن) ذليله
رائعة الشاعر / خلف المشعان العنزي
من يستحي هالوقت وآآآعزتي له 
العرض العادي
