ياعين انا اشوف الصبر اخير من منة بخيل=والرزق بيدين الولي والناس ماهي نافحه
اشوف انابعض العرب ماترغب العلم الجميل=وان جيتها في نفعة(ن) مارحت نفسك سامحه
ربع(ن) معك وقت الرخا وان مال بك وقتك تميل=والا علوم المرجله ماهيب فيها فالحه
مادام حظي منعثر وش لي بصنع المستحيل=من لا كفاه اللي مضى اليوم ويَا البارحه
ليت الردي من خلقته يكتب على وجهه دليل=والا يعلق في جبينه للأوادم لايحه
انا زرعت الحنظله واسقيتها من سلسبيل=لكن جنيت الشوك من روس الغصون المالحه
ماينلدغ مره ومره كود من عقله هبيل=ومن لايحسب المقبله مايحتسب للرايحه
دنيا تشوف ابها الفهد يخشى من البس الذليل=والذيب عدَاه العشاء صوت الكلاب النابحه