منا الدعا والله عليه الاجابة = منا السعي والله كفيل بالارزاق
والله ما ايس دامني في جنابه= ولا ارجي سوى ربي لو ان الفضا ضاق
انا على دين النبي والصحابه=ما نيب لا مشرك ولا نيب بواق
الآدمي هو ليه يفقد صوابه؟=يجزع لطاري الشر وللخير تواق؟
الرزق ما هو بالدها والذرابه=الرزق بيد اللي له الخلق تنساق
والصبر خير وعاقبته استجابه=والقل ما يمنع كريم من انفاق
والجود ما هو جود من عند بابه= سبعين سياره وسبعين سواق
الجود جود اللي قليل زهابه=ولا من عطا يعطيك من كل الاعماق
هذاك لو تطلبْه يعطي ثيابه=ما خاف فقر ولا حبس خشية املاق
العام الاول كنت اراقب سحابه=وانظر لها يا خوك بعيون مشتاق
كنت اتحرى عقب ضيقي رحابه=واقول هلت كل ما خلت براق
واليوم ابشر صحبتي والقرابه=جاني من الله خير طاق على طاق
انا احمد اللي عزنا في كتابه=وارسل لنا خير البشر سمح الاخلاق
المصطفى الهادي عظيم المهابه=اللي بذكره نوّرت كل الافاق