بدخلة امـ خليفه : لا حبيبتي انتي بتدخلين وياي وانه مالي شغل ...
لولوه: خالتي ما عليه اكفخ بنتج
ام خليفه : لا مو ماعليه ... هالقُمر الحلو تكفخينه ... اسحبج من شعرج ... وشنو هالكلام ... اذا انتي ما طلعتي وياها من يطلع وياها ؟... لطوف تعابل عيالها ... وروون ما تبي تتحرك عن لا يخترب شي فيها ...ونوره ويا ارفيجاتها من لها غيرج يا لولوه؟؟
لولوة : ان شاءالله خالتي ... انا اصلا قلت بطلع وياها بس قلت .. ختولي ..

قُمر ضحكت لكلامـ لولوه وردت حق افكارها وحق الخوف الفظيع اللي فيها ... شلون تعيش طول العمر مع انسان ما تحبه ولا تقدر تحس فيه ابدا ... واهي ردت فكرت بزايد اللي حبها من اول ما شافها ببيتهم في زياره لاخته ...
قُمر بنت ولا كل البنات ... واخلاق عسل... ودين وجمال فتان .. كانت تحافظ على طول شعرها ... ولا تحط لها من المكياج الا كحل اللي يبين جمال عيونها ويخفف حده النظرات اللي يسميها عمها جاسمـ النظرات القاتله ... قُمر كانت بطبعها هاديه واجتماعيه بصورة رهيبه ... ورفيجاتها كانوا ماليات نص الصاله ... تحب الاشياء الرقيقه وتحب الاصاله والعادات الشرقيه على غير خواتها اللي معاصرين الحياه بكل معنى الكلمه ... وهذا الشي اللي خله امـ خليل تخطبها لخالد دون خواتها ...
جمال قُمر كان فريد من نوعه... عيونها لوزيه واسعه ... رموشها سود كثييفه متشابكه حواجبها مرسومه على عيونها مثل خالد ... بشرتها كانت بيضه ناعمه على عكس مريم وروان و... شفايفها موردات ..

بعد اخر نداء لها من لولوة تطلب منها انها تستعد عشان يطلعونها ... استسلمت قُمر خارجيا وطلعت منها عبره كلها المـ سالت دمعه على ويهها مسحتها عنها المزينه واهي تبتسمـ لها
(Every thing will be fine. don`t you be worry)
قُمر تبتسمـ لها ... أي ماخاف ... حياتي كلها تحطمت ... للابد ...
دخلت لولوة واهي متغطيه مع بو خليفه ... لبسوها الشنيول الثقيل على شنيولها الفاخر الشفاف ... يودت يدها لولوه وابوها ماسكها من جتفها ... وطلعوا ... مشوا وراها الحريمـ والبنات والمصورة من جدامها ... قُمر ماكانت تشوف شي لان ويهها مغطى عن اللي كانوا بزفه خالد ...
خالد في الطرف الثاني بابهته وكشخته يمشي ويا اخوه خليل وعمه جاسمـ وابوه من وراهمـ . تلاقوا عند باب الصاله وكل اللي بالصاله عيونهمـ على الباب ...
جاسمـ اول من تكلم: مبروك قمورة
قُمر ردت بصوت شبه مسموع: الله يبارك فيك عمي ...
جاسمـ طالع خالد بنظرات شر عشان يكلم قُمر...
خالد من غير نفس: الف مبروك يا قُمر ...
قُمر بغير نفس واهي تصرخ في داخلها (الف رحمه علي مو الف مبروك): الله يبارك فيك ...
مريمـ: يالله بسرعه خلونا ندخل ... ووقفت يمـ خالد وجاسمـ يمها ...
دموعها تجمعت بعيونها تعلن التساقط ... اخذت نفس قوي ومشت... الاضاءة كانت خافته ... والفرقه تطق على اغنيه هب السعد التقليديه ... والجو صار ملائكي ... طبعا رفيجات قُمر شافوا قمر احلى بالف مرة بس البنات اللي ما يعرفون قُمر قاموا يقولون... اكيد اهي جيكرة ... احد يتزوج واحد حلو لازم يطلع الثاني جيكر ومو حلو ..
وسميه اشطن رفيجات قُمر تكلمـ ناديه: والله قهر ... ماادري اخبصها بطراق على ويهها
ناديه: اووش وسميه شفيج بتتهاوشين هني بعد ... خليهمـ بينصدمون لين ترفع الغاليه الطرحه
وسميه: بس آه ... قهر
ناديه: يناسب قُمر ... بس وايد متكبر

وصلت قُمر وخالد للكوشه و كلهمـ وراهمـ ... جاسمـ اول ما شاف لولوة ما شال عيونه عنها ... جاسم قوي عين ولين يطالع احد ماينزل عينه ... لولوة لاحظت عيون جاسمـ وتاكدت انه مو المعرس مثل ما فكرت ... بس عطته لا مبالاه للامر ..و زاد عناد جاسمـ .. ركبت قُمر الكوشه على هدوء ومريمـ ولولوة يساعدونها ...
مريمـ لخالد: تقدر تساعد ولا يدك منشله؟
خالد: مو شغلج ... محد قال لها تلبس هالفستان...
مريم: سخيف
خالد : خليت خفه الدم لج .
مريم : يالله عن الكلامـ الفاضي ويالله ارفع شنيولها

خالد يلتفت واهو يتنهد ويرفع شنيول قُمر... اول ما رفعه وقف قلبه ... ما شاء الله ... في احد بالدنيا يملك هالملامح غير الحوريات ... حس عمره يرتجف ... ما ظن ان قُمر الشيطانه الياهل تصير مثل هالحوريه ... قُمركانت منزله عيونها ..
الكل شهق يوم شاف قُمر ... البنات بالصاله ... ورفيجاتها لكن وسميه الشيطانه وقفت اهي وشهلا وقعدوا يصلون على النبي عن الحسد ..
مريمـ: مدي يدج قمور
قُمر بخوف: ليش.
مريمـ: بنعضها
قُمر انحرجت من مريم .. ساعات تقهر
خالد بهدوء: ماتبين دبلتج يعني
قُمر زادت احراجها .. يتكلمـ وياها بطريقه تبجي الواحد .. مدت يدها المرتجفه .. لبسها الدبله

جاسمـ لاحظ على خالد انه متعجب من جمال قُمر .. حتى جاسم نفسه انصدمـ...بنت اخوه .. احلى من القمــر .. الكل بارك للمعرسين من الاهل ... ابو ابراهيمـ يود يد قُمر ولبسها خاتمـ ذهب ضخمـ مرصع بالماس ... لمعت دموع قُمر بالماسات ورفعت راسها تبوس عمها على خده ...
بو خليل: ماخطيت يوم خذيتج لخالد ... بنتي واخذت ولدي ... الف مبروك يا قُمر بن ظاحي
قُمر تاثرت وايد من كلامـ عمها لكن وين: الله يبارك في حياتك
تحرك بوخليل يعطي مجال لابو قُمر يهنيها ويبارك لها ...
جاسم: الله بالزين يالحور والله ما خطى الوالد يوم سماج قُمر
قُمر: الله يخليك عمي ..
جاسم: أي الله يرحمه الوالد .. ياريته ويانا
قُمر من صج تمنت هالامنيه لانه يدها مستحيل يخليهمـ يزوجونها بالغصب وسبحت دمعه بعينها .. الله يرحمك يا يدي .. لو تشوف حالتي اليوم شنو بتقول ..
بعد ما هدى الجو شوي على الكوشه ... قعدت الفرقه عند طرف المسرح بالمكان المخصص لهم خلف الستار ...

قُمر مع خالد ...بنفس الكرسي.. قربهمـ لبعض كان ولا شي بالبعد والبرود اللي كان بيناتهمـ ... كانت المصورة تبي تاخذ لقطات رومانسيه بين العروسين بس ما قدرت ... خالد يا يوقف واياديه متشابكه وقُمر تشغل نفسها بالبوكيه الضخم ... او كل واحد منهم يطالع الجهه الثانيه ... راحت المصورة عنهم وخالد قعد يتنهد .. قُمر التفتت له .. صج تغير .. اخر مرة شافته قبل 5 سنين كان للحين بالكويت .. بس خسارة .. ما تقدر تحس فيه .. ما تقدر تشعر بوجوده..
فستانها كان من الحلا والفخامه لدرجه انه طاح على ريل خالد بعد .. فستانها من تصميمـ امريكي .. تلتف نوع من الحركه على رقبتها تغطي اليد الثانيه .. الفستان محفف بلمعه ذهبيه وحتى داخل الورود المطرزة.. خصلاتها كانت طايحه على جتفها من طول شعرها ولان بعد التسريحه خفيفه ومافيها مثبت بس شكلها كان روعه ..
قُمر كانت مفتشله واهي تحمل البوكيه ... كان اكبر منها وثجيل... بس لولوة واوامرها ... كلمت مريم عن البوكيه اللي بالغرفه اتييبه لها احسن من هذا ... راحت مريم ويابت البوكيه اللي كان احلى وانعمـ بالف مرة عن إللي عند قُمر ... حتى انه لفت انتباه خالد ... وتحمد الله عن البوكيه الثاني ... قُمر كانت اللي مصممه الورد بهذا البوكيه ... منسقه الالوان بين الاصفر والابيض ... لان فستانها كان ابيض بلمعه الذهب على الاطراف وبين النقش اليدوي ... خالد كان يفكر في ندى ... ويتخيلها على الكوشه وياه ... حس بالغصه .. وانه ما يقدر يتنفس ... ولا يقدر يسوي شي الا انه يستسلمـ ويسكت... يو البنات يسلمون على قُمر ..

وسميه: الف الف الف مبروك يا قُمر ... والله انج جيكرة ...صج لي قالوا المكياج فن ... ههههههههه
الكل ضحك وخالد قعد يسمع كلامهمـ
وسميه: الا قولي لي ... خدودج ليش حمر ... خلصتي بلاشر الدنيا ... صج انج مصطنعه
قُمربابتسام: وسووووم
وسميه: هااااااا. جانزين والله انتي تحلمين في ملمح من ملامحي ... - تأشر لناديه ولاشرايج ندوي ..
خالد التفت من الاسم علباله ندى...
نادية: أي اي ...
شهلا: بس عاد فضحتونا .. توجه كلامها لخالد: الف مبروك عليك بقُمر ... تراها غاليه حطها بعيونك ماقصرت ويانا والله لو مااهي جان احنه نعيد السنه الله يخليها
وسميه: أي والله الله يخلي براشيمها سنعه ولا احد يشوفها ههههههههههه
قُمر انحرجت من وسميه وشهلا: بس ... اششش

حتى خالد اللي حلف على عمره ما يضحك ضحك على خبال رفيجات قُمر ... حس انهمـ صغيرات وعلى نياتهمـ ... مثل قُمر ... يطالع قُمر ...واهي تبتسمـ .. يا ترى حياتنا شلون راح تكون يا قُمر ... شلون راح نعيش عمر كله مع بعض وانا مااحس بشي تجاهج ..
وسميه تتكلم هالمرة بجديه اكثر: صج صج خلود (خالد فتح عيونه ...اصغر عيالها خلود ) اوه اوه خالد الشيخ ... قُمر عزيزة وغاليه ولو انها عنيده وايد بس حبابه وانا ارفيجتها من يوم الصف الاول أي من بعد لولوة ... حاسب عليها ... وحطها بقلبك قبل عيونك ...
خالد بكل جديه: ان شالله اقدر على اللي تطلبينه
الكل استغرب من كلامه الا قُمر اللي ما تعير كلامه أي انتباه...
لولوة: يالله يا بنات ...
قُمر بصدمه: وين رايحه
لولوة: بسمـ الله الرحمن اهني يا حبيبتي .. بس زايد اخوي بيوصلهمـ ..
قُمر لمعت عيونها ..

وسميه بدت تبجي بس على هدوء: بتوحشينا يالخايسه والله انج .. -تقطع صوتها قمور ..
قُمر بجت وياهمـ .. رفيجاتها ما راح تشوفهمـ مرة ثانيه .. وان شافتهمـ يمكن مرة بالسنه ..
قُمر توصي وسميه واهي تبجي: تكفين وسومـ لا تنسيني وكل ما تكتبين شي ذكريني .. احب قصائدج
وسميه لمت قُمر: فديت عمرج وانا لي غيرج ..
ناديه مسحت دمعتها: يالله وسوم حرام عليج بجيتيها.. قمور.. لا تنسينا .. انتي بالقلب خلينا بالقلب ..
قُمر: دوم بالقلب ... ندوي هاج أي شي محتاجه له لاتنسيني (ناديه بنت شهيد ومن اسرة محتاجه وقُمر ما تقصر وياها وويا اهلها )
ناديه: انا اقدر .. انتي الغاليه ..
قُمر: الله يخليج يا بنت الشهيد .. (ناديه تحب الاسم إلى تناديه قُمر لانها كانت على طول تفخر بكونها بنت شهيد)
شهلا: حبيبتي لا تنسيني تبين حجاب ولا عمل ولا يني انزله باحد دقي علي ام الطبوب انا
قُمر تضحك واهي تمسح دموعها: ما شاء الله عليج هههههههه

ودعوا قُمر وراحوا عنها وخلوا قُمر بذكرياتها ..
قعدت قُمر مكانها واهي موخره راسها تسترجع الذكريات ... الهده ... وايام الامتحانات ... والتوصيلات وسوالف وسميه .. وهواش الصف والابلات والفرصه ..

وتذكرت اول ما شافت زايد عند المدرسه .. تذكرت صدها له .. كانت مراسيله توصلها واهي تشقهم وتحتفظ بالورد ..لانها تقدس العادات وايضا الحب فما تفكر انها توهبه لكل انسان .. ومع خالد ما راح توهبه لاحد... بتحتفظ فيه بقلبها ... لنفسها... لين مايصل الانسان الي يستحقه .. من هو ؟ ..

خالد من طرف ثاني كان يطالع جاسمـ اللي الجو عنده عال العال .. والاهل كانوا فرحانين حيل .. ماكو الا اهو ... مع ان النار اللي فيه تخف شوي شوي وتهدى وكانها تستعد لعاصفه بس اهو ما يدري عنها ... عيونه كانت موجهه على الباقه اللي جدامه ... مايطالع الناس القاعده وما لاحظ البنت اللي قباله ودموعها بويها ..

شيماء: يالله يا ندى ... مافينا نفشل روحنه اكثر ... لي متى بنقعد هني ... الناس كلها طلعت ما بقى الا اهله
ندى: مااقدر يا شيماء ... اقوى مني ..
شيماء: بس يالله قومي نطلع ... اكيد يبون يقعدون لحالهمـ ..
ندى تمسح دموعها : بس اول شي اسلمـ عليها ... واشوفها ...
شيماء: لكن يا ندى ..

وين الردود؟؟؟

يسلمو عزيزتي على الروايه الروعه ^^
لكن الموضوع مكرر وسيغلق
اعذريني
تقبلي تحياتي لك