السلام عليكم ورحمة الله وبركاته
اليوم صارحتني زميلتي بسر خاص فيها وطلبت مني أطرح الموضوع عليكم في المنتدى وأشوف ردودكم حوله وبصراحة ..
الموضوع ياحبايبي يتعلق فيها هي وولد خالها .. راح اقول الحكاية من البداية ..
البنت .. عمرها ( 29 ـ30 ) سنه موظفة على بند طيوبه جداً لدرجة أن اللي حولها يستغلون طيبة قلبها .. يتيمة معتمدة على نفسها في أمورها وعلى السواقين بشكل كبير خصوصاً ان اخوانها ما يهتمون فيهم كثير باره في أمه ويمكن يكون هذا سبب في رد أخوانها للخطاب اللي يتقدمون لها وكل واحد يطلعون فيه عيب ..
الولد .. عمره ( 20 ـ 21 ) سنه خريج ثانوية يعمل مؤقتاً مؤذن في مسجد ومقدم على وظيفه عسكريه وينتظر الرد ..
أنسان خلوق رغم صغر سنه الا انه يمتلك عقل كبير وعنده قدره على التصرف وعنده غيره واضحه على أهل بيته ملتزم , ما تفوته الصلاة في المسجد , بعيد كل البعد عن تصرفات بعض شباب ها اليومين يعني لا يغازل , لايدخن , لايشيش , ويدور الحلال ..بار في والديه حنون على خواته بشكل كبييير ومن بره لوالديه طلعتله قبل فتره وظيفه عسكريه بس في منطقة بعيده عن اهله هو عادي عنده البعد لكن ابوه تعب كثير لانه سبحان الله يحب الولد هذا ويعتمد عليه في كل شيء ومن خوفه على ابوه ترك الوظيفه وقال ان شاء الله ربي بيعوضني خير منها ..
المهم الولد هذا شاف البنت هذي من حوالي سنه لانها صيفت هي وامها وخواتها عندهم لمدة شهر .. أعجبته البنت في اخلاقها وتصرفاتها وحنانها على أمها وعرف كل شيء عنها حتى استغلال خواتها لها وغيرتهم الواضحه منها حبها وتعلق فيها وتقدم لها لكن هي رفضت بسبب فارق السن والوظيفه مع العلم أنه عاجبه وقلبها مال له بشكل كبير المهم عدت السنه على الولد وهو مازال يفكر فيها وعدت على البنت وهي تحاول انها ما تفكر فيه الا انه مازال يجيها في احلامها ويكون الوحيد اللي يساعدها ..
السنه هذي رجعت البنت واهلها عند خالهم وجلسوا عنده لمدة شهر واسبوع صار فيها تطور كبير بين الشخصين عن طريق رسائل البلوتوث والنقاش في عدة مواضيع وتبادل الآراء بينهم لحد في يوم الولد اعترف لها بمشاعره وانه يحبها ويبيها زوجة له على سنة الله ورسوله طبعاً البنت تشقلب كيانها ووزنتها في عقلها وصارحته بسبب رفضه له المرة الاولى .. لكن هو قالها أنا ما يهمني فارق السن اللي بينا ولا أشوفه سبب كافي للرفض وبالنسبة للوظيفة فأنا متأمل خير في الوظيفة اللي مقدم عليها وأنا أحبك وشاريك وأتمنى من كل قلبي أنك تكوني زوجتي وقريبه مني لكن إذا الله ما كتب لنا نصيب مع بعض أتمنى لك كل الخير وأن ربي يرزقك بأحسن مني ( مع العلم إن البنت كان متقدم لها ولد عمها من سنه ورفضوه أخوانها بحجة الوظيفة .. وهو الآن متوظف وممكن في اي وفت يتقدم لها )
طبعاً الولد صارح ابوه وأمه بحبه للبنت وإنه يبي يخطبها وكان قبل فترة قايل لعمته وهي موافقه عليه .. طبعا ابوه وأمه فرحوا بالموضوع لانهم يحبون البنت كثييير والخال فتح الموضوع للبنت واخذ منها الموافقه مع تصريحها بأنها تحب الشخص هذا .. لكن تأجلت الخطوبة حتى تطلع الوظيفه عشان ما يرفضونه أخوانها ..
المهم العلاقة بين الطرفين بعد السفر ما عاد فيها بلوتوث وصلت للمكالمات البسيطة للاطمئنان على الصحة وكل واحد وضحت شخصيته للثاني وهو صارحها أنه يرغب أنها تترك الوظيفه بعد الزواج وأنه ماراح يقصر عليها في شي ولها حرية الاختيار وتوقفت عند الحد هذا..
يمكن أكون طولت عليكم لكن أبي رأيكم في موضوع فارق السن .. وفي شخصية اخوان البنت وهل ممكن ان الحياة بين الطرفين تكون ناجحه وخصوصاً انهم متشابهين في أموور كثيرة ومتفقين على أسس حياتهم إن شاء الله
عن جد البنت تبغى رأيكم في ها الموضوع وخصوصاً إن واحد من اخوانها رافض أنهم يأخذون من عيال خالهم لانهم عائلة جنوبية وما يناسبونه لانهم عائلة نجدية ..
بانتظااااااار ردودكم على الموضوووع
صديقتي وولد خالها وفارق السن .. تعال وعطنا رأيك وبصراحه 
العرض العادي
