بسم الله الرحمن الرحيم

السلام عليكم ورحمه الله وبركاته ..

تحية مني لكم ..

أهلا بكم .. في صفحتي المتواضعة ..
وأني لأتمنى منكم .. قرآة ما خطه قلمي المتوواضع
ولتبدو في رأيكم فيه من خلال قصتي ..

.. دامك جرحت القلب داويه ..

وحقيقه هذه أول محاوله لي في كتابة قصص من هذا النوع .. ولذلك أتمنى ان تعجبكم .. وأني لأتمنى ان تقرأ من قبل كتاب القصص لأرى منها انتقادتهم .. للسعي للوصل للأفضل .. وبالأخص أتمنى قرآته الأخ الكاتب
(Emaraaaaty .. لأن في الحقيقة يعجبني ما خطه قلمه ) والأخت الكاتبة ( حمران النواظر .. تعجبني كثيرا كتابتها ) لأرى منهم الإنتقادات والتوجيه

وبداية قبل أن أبدأ بذكر شخصيات القصة .. فأني أقدم لكم نبذه من سطرين عن ما أتحدث عنه في هذه القصه ..

أن هذه القصه منسوجة من أحداث الحقيقة وأحداث الخيال .. حيث يغلب عليها طابع الخيال .. تدور محاورها ، حول العديد من الأشياء .. منها المشكلات والحلول .. والعديد من الشخصيات ، من مختلف الأعمار .. وهنالك منهم منهو الملتزم ومن هو المنحرف .. وهي ليست على نمط معين " كإسلامي فقط ، أو كما يقال قصص الحب " بل دمج .

وأتمنى لجميع من سوف يقرأها قرآه ممتعه .. وأني لأتمنى منهم إبداء رأيهم وبكل صراحة ..

وأعرفكم بشخصياتها

عائلة بو ناصر
بو ناصر ( راشد ) العمر 52 سنه
ام ناصر ( روضه ) العمر 48 سنه
ناصر الولد البچر العمر 28 سنه
عبدالله العمر 24 سنه
مايد العمر 20سنه
حلا آخر العنقود 17سنه ( وبطله الأبطال لقصتنه )

ميثا تصير زوجة ناصر وعمرها 25 سنه
وولدهم محمد وعمره 4 سنوات

عائلة بو بخيت ( بو بخيت اخو بو ناصر " راشد " )
بو بخيت ( يابر ) العمر 49 سنه
ام بخيت ( وضحه ) العمر 46 سنه
بخيت 25 سنه
عفرا 22 سنه
علي 20سنه وهو رفيج مايد الروح بالروح
واليازيه 18سنه

عائلة بو حميد ( المرحومة زوجة ابو حميد تصير اخت ام ناصر )
بو حميد 50 سنه
حميد 27 سنه
حنان 23 سنه
أحمد 19 سنه
قمر 17سنه ( رفيجة بطلتنه حلا ) >>على فكرة اسم قمر من تسمية وحده من اغلى صديقاتي
والصغيرة عهود 15 سنه

وشوق 24 سنه وتصير زوجة حميد
وعندهم بنت صغيرة اسمها ندى عمرها سنه

ام حميد شيخة توفت واهي تربي ببنتها عهود

وبالطبع هذول الشخصيات الا في البدايه والشخصيات الباقي مثل بطلنه بتعرفونهم مع سير أحداث القصه

وأحب أخبركم .. انّي راح أنزل كل اسبوع يوم الخميس جزء .. " مو لشي بس علشان اخذ وقتي ، واركز علشان ما أقع في الاخطاء "
السلام عليكم


الجزء الأول

@@@@@@@@@@@@
اليوم : الثلاثاء
الساعة : 04:38 بعد الظهر
المكان : سيارة مايد
@@@@@@@@@@@@

مايد كان ساير ياخذ اخته حلا بيت خالتهم المرحومة أم قمر ، حلا كانت فرحانه وايد لانها بتشوف توأم قلبها وروحها قمر الا صار لها يومين ما شافتها . حلا ساعتها كانت سرحانه تفكر بالهديه الي راح تهديها الى قمر بمناسبة نجاحها لان باليوم الي بعده راح تطلع النتائج وحلا كانت تعرف نتيجة قمر سلفاً فكانت الافكار تاخذها وتيبها كانت حيرانه اش تعطيها تبي هديتها تكون مميزة وغير عن كل سنه وبنفس الوقت تعيب قمر ( حلا وقمر بثاني ثانوي علمي وحلا وقمر متعودين كل سنه يهدون بعض هدايا النجاح لانهم دايماً الأوائل بمدرستهم )
مايد وهو يمسك بإيد أخته : حلا ، حلا
حلا : لبيه
مايد : يلا نزلي وصلنه بيت خالتي .
حلا : سوري ما انتبهت ، كنت افكر بـهدية لقمر بمناسبة نجاحها تراني حيرانه ومب عارفة شختار .
مايد وهو مستغرب : ليش ظهروا النتايج ؟ مب قايله انتي ان بكرة يطلعون .
حلا : هيه ، بكرا بس أنا ادري انها اكيد الاولى ، مايد طلبتك ابيك الليله تاخذني اتسوق ردتنه من بيت خالتي ، ابي اشتري لقمر الهديه .
مايد : تامرين يالغاليه ، اوديج تاخذين هديه و بعد اوديج السينما يقولون في فلم حلو نازل يعرضونه هالفترة ، انتي بس خليج جاهزة ع الساعه ثمان ونص بيي آخذج وبوديج مكان الا يعجبج .
حلا تبوس مايد : فديتك اخوي مشكور ما تقصر .
مايد : زين يلا نزلي ، كأنج عطلتيني مواعد ربيعي ما ابي اتاخر عليه .
حلا وهي نازله من الموتر : تحمل بروحك مو تسرع ، فحفظ الله .

حلا بنت جميلة لدرجة غريبة ماخذه من ملامح امها وابوها وايد واهي قمر بكل معنى الكلمة بيضا محمرة عيونها وايد واسعة ولونه عسلية فاتحة ، وخشمها طويل مثل السيف وبوزها صغير مثل الفستقه . واهي طويلة نسبيا ( طولها 165 سم ) شعرها بني اشقر ناعم طويل لتحت الحوض .
مايد اخو حلا بعد جميل وملامحه حلوه تخلي كل بنت تتمناه .. لون بشرته برونزي عيونه واسعة لكن مو بوساعة عين حلا لكنها عسليه فاتحه افتح من عينها والخشم والبوز مثل الشيء تقريبا . وهو بعد طويل ( طوله 180 سم ) ، وهو من شكله له هيبه ويبان عليه انه ريال ولا كل الريايل وابتسامته دايماً ما تفارق ويهه وهذا الي محليه دوم والي يخبل البنات عليه .

نرجع لأحداث القصه ..
دخلت حلا بيت خالتها .. وشافت هناك قمر وأحمد وعهود يالسين في الحوي ، بالاطلاله الي جدام المسبح ، هذي الإطلاله مكونه من 3 كراسي يتسعون لخمس اشخاص كرسي كبير يتسع لثلاث اشخاص وكرسيين صغار لشخص واحد مع طاوله صغيرة حلوه مصنوعين من خشب ومطليين بلون ذهبي على ابيض وطالعين بشكل وايد حلو وخصوصا ان الكراسي منحوتة بطريقة روعه ومحفور فيها بعض الرسمات الطبيعية الحلوه . عهود كانت ماكانت يالسة كانت منسدحه على ريل اخوها احمد وكان يلعب بشعرها وقمر يالسه على الكرسي الا صوبهم .
حلا يت صوبهم وعقت الغشوة ودخلت الشعر الي طالع من شيلتها بحكم ان احمد يالس هناك واهو مب من محارمها .
حلا بابتسامة : السلام عليكم .
ردوا عليها كلهم : عليج السلام .
أحمد كان قلبه يدق بالقو ، وكان يحس بسعادة مالها مثيل وكأن قلبه قام من مكانه وراح لعندها ( أحمد يحب حلا وايد ومتعلق بها من الصغر بس محد كان ملاحظ عليه هذا الشيء )
عهود : شلونها حلا الحلوه الهذارة والبلوه ؟!
أحمد وهو يباعد راس عهود عن ريله : انتي امتى بتكبرين ، ما تعرفين انه عيب ترمسين الي اكبر عنج جي ، الحين اش بتقول عنه حلا يكفي انها يومين ما يات بسبتج .
عهود الي كانت مستغربة من اخوها والدمعة في عينها لانها مب متعودة معاملة جدية من اخوانها وبالذات احمد لانه كان قريب وايد منها : اش فيك ياخوي انا ماسويت شيء بس كنت امزح معاها وماظني انها تزعل .
تتدراك حلا الموقف : أنا مازعلت ، اصلا انا مستحيل ازعل من حبيبة قلبي الغالية عهود ، وتلم عهود لصدرها ، بس حبيبتي لا تزعلين واكيد احمد يمزح معاج وما يقصدها .
أحمد انتبه للي سواه وظل متلوم : أنا آسف عهود مب قصدي ، بس حسيت انج فشلتي البنت فقلت خل اقولج مب حلوه تقولين لها جديه يمكن تتضايق والا شيء . واخذ عهود ولماها لصدره وعهود بعدها مبرطمة وماده البوز شبرين .
قمر وهي تغمز لعهود : بس عاد عهود بلا دلع كاهوا الصبي اعتذر ويقول بحوطنه بكرة وبياخذنه السينما علشان يراضيج بس عمري لا تبجين .
أحمد حس ان في مؤامرة راح تصير ضده : لالا يبا خلها زعلانه مني لي باجر انا ما بحوط أحد .
عهود وهي تدز أحمد على خفيف : خلاص أنا بظل زعلانه طول الحياة منك .
حلا : افا ولد الخالة تزعل البنت ، ترا اقولك من زعل بنت خالتي زعلني ، والا انته ما تبي توديها لاني ابا اكون موجوده ، ادري بك ما تواطني بعيشة الله ولا تبيني ايي وياكم لكن عناداً فيك انا اول وحده بكرة في الطلعة .
أحمد وهو متشقق من داخل بس يحاول يظهر العكس : توج دارية ان احنه ما نبيج ويانه ، حررة " يطلع لسانه لها يبي يغايضها .
حلا تغمز لعهود و قمر وقاموا الثالث كانهم ينانوه : وراحوا صوبه .
أحمد حس انه بروح فيها وقام يصارخ : خلاص اسف مستعد اشتغل سواق لكم وبوديكم مكان الا تبون بس تباعدوا عني .
قمر : احيدك تعرف المثل الا يقول اذا فات الفوت ما ينفع الصوت .
وقاموا سحبوه ثلاثهم للبرجة وطيحوه في البرجه وقعدوا يضحكون الي يشوفهم يعتقد انهم مسوين انجاز عظيم مسويين انجاز عظيم .


أحمد اسمراني عيونه واسعة لونها بني غامج يلبس نظارة مربي شعره لي جتفه واهو وايد حنون وطيوب واكثر شيء يحب اخته عهود الي يحسها انحرمت من حنان الأم ولذلك يحاول يكون مثل الام والاخ لها .
قمر حطناوية عيونها مب واسعة وايد وفيها من ملامح مايد ولد خالتها بدرجة كبيرة ، واهي وايد قريبة من بنت خالتها حلا ، وتحب تيلس وايد مع ام حلا لانها تحسها مثل امها وفيها من ريحة امها المرحومة .
عهود ملامحها بريئة وايد ، يبان عليها من ملامحها الحزن ، واهي اكثر وحده متأثرة من غياب امها عنها خصوصا في هذي المرحله الحرجة الا تمر فيها واهي بعد وايد قريبه من خالتها واخوها أحمد بالذات .


@@@@@@@@@@@@
اليوم : الثلاثاء
الساعة : 5:30 العصر
المكان : ع البحر وقت الغروب
@@@@@@@@@@@@


كان مايد يالس مع علي ولد عمه على البحر جدام منظر الغروب وكان مايد
يلعب بالرمل والأمواج كان صوتها مغطي المكان كانها تعاتب بعضها و تتضارب وفي نفس الوقت تلم بعضها بحسرة وحزن وكانت تروح وتجي تغطي ريل مايد وتلامس اياديه الي كانت تلعب بالرمل ، اما علي فكان داخل في الماي والماي مغطيه لفوق ركبته وكانت كندورته خرسانه كلها من الماي .

علي كان ساعتها منهار تمامًا ومنصدم وقلبه كان منحرق حراق كانت النار تلعب فيه وصوت ضحكاتها عالي بكل مكان كان يحس برجفه ، كان يحس انه صاير ثقيل ما ينشال من كبر الهم الا على قلبه والنار الي تسعر فيه كان يحترق ويذوب والدمع بعينه وكل هذا من الي شافه اليوم من ياسمين البنت الي حبها واخلص لها على الدوام ( علي كان يحب بنت تعرف عليها بواحد من مواقع الشات على الانترنت كانت حلوه الا يشوفها يظنها ناعمه وبريئه وتقدرون تقولون ان كل الشباب اذا شافوها يعجبون بها وهذا الا صار في علي ) ، تواصل وياها لين ما ظن انه حبها كان يرمسها دايماً عالتلفون ويطلع وياها كان ما يفارقها ولا لحظة ولو فارقها بالمكان والا بالجسم ما يفارقها قلبه وما يغيب طيفها عن عينه، كانت عينه معميه عن الحقيقه للين ما شاف الا شافه . كان طالع يتحوط مع مايد ولد عمه وشافها تتمشى ووتضحك مع واحد من هالشباب الخمه في واحد من السناتر . وفهم حقيقه هذي الياسمين وعرف انها تلحق وراه بسبب فلوس ابوه ( ابو علي كان يملك شركه مقاولات كبيرة لها اسمها وسمعتها في كل البلد ) .. والدليل انه تذكر واحد من المواقف الا وياها .
( علي وياسمين كانوا يرمسون بعضهم بالتلفون ...
علي : happy birth day حبيبتي ، كل سنه وانتي طيبه .
ياسمين وهي تقول مالت في داخلها : بس تقول لي جيه اهئ اهئ اهئ وين الهديه ، انا الحين قايلة لك ومبديتك على الكل وبعدين ماكو هديه لالا ، انا زعلت .
علي : افا يالغاليه ، اي شيء تبينه ايبه لج ، لو تبينه عيوني اجلعها لج واعطيج اياها ما ابخل عليج ابها ، انتي اشري بصبعج ع الي تبينه وانا ايبه لج .
ياسمين : انا ما امبي شيء غالي وايد ، بس انا ودي من زمان بخاتم ألماس ، من صغري وانا احلم بخاتم ألماس .
علي باستغراب : خاتم ألماس ؟
ياسمين مخليه صوتها بنبرة حزن وكأنها تبجي : اذا مو قدرتك تيبه لا تيب ولا تتعب روحك .
علي : افا حياتي ، مو قصدي والا تبينه قولي لي عنه وانا ايبه لج من عيوني هذي قبل هذي .)
وكثير من المواقف مثل هذا الموقف ودايما طلبات وهدايا يوم موبايل ويوم خاتم الماس ويوم سلسله ذهب ويوم ويوم .
وعلي كل ما يذكر يحترق اكثر واكثر وصدى صوت الموج يتعالى ويه صوت ضحكاتها الساخرة ويتردد بقلبه المجروح


مايد تحرك من مكان وتجدم لعلي وراح يهزه : علي علي .
علي : ترمسني ؟
مايد : هيه ارمسك وين وصلت يا ريال ، ساعه صار لي اكلمك وانت مول مب وياي .
علي وهو يتجدم اكثر لداخل البحر: آآه مب قادر اصدق الي شافته عيني مادري حاس اني في حلم ، مب عارف ابجي والا شسوي ، ماقدر اصدق ان ياسمين البنت البريئه الا أنا حبيتها من كل قلبي ، تطلع افعى ، همها بس تلدغ وتجرح ، مب قادر اصدق ان كل هذا لعبه من ألاعيبها ، مستحيل مستحيل .. ياسمين تحبني ليش تسوي جذيه ليش ليش .
مايد : هد روحك ياخوي ، والمفروض انك تحمد الله لان بانت لك حقيقه هذي الحيه قبل لا تخطبها والا جان تورطت ورطه عوده .
علي وهو مب عارف شيسوي : الحمدلله
مايد : الصراحه مادري شاقول لك بس أنا كنت شاك فيها كنت حاس ان هذي العلاقه فيها خلل ، تقدر تقول انّي كنت ادري انها ما راح اتم ، بس انت فكر فيها ، هذي العلاقة في الأصل اساسها مب قوي ، اساسها محادثه بشات وتقدر تقول ان هذي البنت قاصه على عشرين واحد قبلك وبعدك ، وانت فكر فيها برايك ان في وحده محترمه صاينه اهلها بتكلم واحد في شات وبتخون ثقة اهلها ، ما تظن انها ممكن حتى تخون اقرب الناس لها دام خانت اهلها ؟؟
علي وكأن احد كات عليه قلاص ماي بارد : ....
مايد : اش فيك جاوبني ، المفروض انك تفكر شويء مب كلمتها في دقيقه بشات تعلق قلبك بها ، فكر بعقلك مو تخلي كل من جه يسويك لعبه ويقص عليك .
علي ساعتها ما تحمل خنقته العبره وسالت دموعه على خده : ليش آنا حظي دوم جي ، دومي الخسران دومي ينقص علي ، الكل يشوفني بصورة اني واحد مافتهم غجري .
مايد : لانك وايد طيب وحنون ويمكن هذا عيبك ، وانت ما عليك من الي راح ووردر هالبنت ، واباك توعدني انها بتختفي من قلبك ومن حياتك مثل ما تختفي الشمس الحين بها المنظر، وما يصير لها عودة ابد ، وحاول انك تقسي قلبك شويء ومو تلينه لاي احد وفكر في حياتك ومستقبلك ولا يهمك ياسمين وامثالها .
علي : مشكور مايد ، احس قعدتي وياك واني فضفضت لك خففت عني وايد .
مايد : حياك يا خوي واي وقت تحس انك محتاج ترمسني تعال لي .
علي : اوكي بس خلنه الحين نقوم نروح البيت ونجهز نفسنه لروحه المسيد ونبدل كناديرنه تراه مابقى شيء على الاذان الا ثلث ساعه ع الاذان ما نبي نتاخر على صلاة الجماعه .
ومسك علي ايد مايد وراحوا ياخذون اغراضهم من على الصخرة ( كانت صخرة عودة شكلها غريب وكانت صايرة من اكثر من لون .. سبحان الله ) الا كان مايد قاعد عليها قبل لا يقوم ويروح لعلي

علي شاب مب بذاك الجمال ضخم اسمراني ، يتميز جسمه بقوه عجيبه ، لكن اهو انسان وايد شفاف وناعم وحساس ، وغير هذا وذاك يتميز بالمرح وانه محبوب بين الجميع .


@@@@@@@@@@@@
اليوم : الثلاثاء
الساعه : 07:00 المغرب
المكان : غرفة قمر في بيت بو حميد
@@@@@@@@@@@@

بعد ما اذن المغرب نشوا والبنات لغرفه قمر يصلون .
غرفة قمر كانت بمنتهى الروعه وواسعة وألوان جدرانها ما بين الابيض والوردي والرصاصي وبنظام الجدار المميز وكانت حاطه صورتها بزواج اخوها حميد مكبرة مع شويه صور صغار صوبها وصورة لها اهي وحلا وعهود واحمد لما كانوا صغار، الستاير كانوا باللون الأحمر الغامج ( ماروني ) على وردي والسرير والكبت والتسرحية كانوا باللون البيجي وشرشف السرير كان بلون الستاير وصايرة نقوشه ناعمه تقريبا مثل نقوشها والزوليه كانت مارونيه على ورديه لكن افتح من الستارة وموب صايرة على قد الغرفه كان الرخام يبان وكان منقوش عليها نقوش ملكية روعه ، وكان الكبت بغرفة صغيرة " غرفه ملابس " وفيها باب الحمام للغرفه ، الغرفة فيها دريشتين واحد قريبة من السرير ووحده صايرة على واحد من الجوانب وصاير صوبها جلسه صغيرة 3 كراسي حمران ناعمين .
من بعد ما صلوا البنات يلسوا يهذرون ويلعبون بته .
حلا : اقول برنسس عهود لو تودرين الغش عنج تره وايد احسن .
عهود : سمعوا من يرمس ، لا تصدقين عمرج وايد مسوية روحج شريفه وما تغشين ، الا يسمع هالرمسه يصدق انج ماغشيتي طول عمرج .
قمر : هيه صدقها اخته انتين دومج تغشين ومسوية روحج احس وحده .
تنش عهود وتبوس خد اختها احسن شيء انتي بها الكون ماشيء احد يفهمني شراتج يا اغلى اخت بها الكون .
حلا وهي تبجي يا زعم : اهئ اهئ اهئ ، هذا وانا حبيبتج ورفيجتج وبنت خالتج تسوين فيني جي ، الله يستر لو كنت عدوتج اش سويتي فيني .
قمر تلومت من حركتها وقامت ولوت على حلا : اش فيج يالغاليه زعلتي آنا بس ابي اسوي سوالف ، مب قصدي ازعلج ولا ظنيتج بتزعلين .
حلا تمد لسانها لعهود وتسوي لها بايدها حره وعهود ساعتها كانت حترقه من الغيض والقهر وكانت معصبه عدل على اختها .
ثواني ويات اختهم حنان تيلس وياهم بس ما كنت تدري بالي صاير .
حنان تشتغل ممرضه في مستشفى البراحة موظفينها مؤخرًا حنان بنت شفافه وناعمه وهاديه ، بشرتها بيضا محمرة وتاخذ من ملامح ابوها وايد عيونها زجاجية عجيبه تخلي كل الشباب يموتون على اظافيرها .
حنان : السلام عليكم .
البنات : وعليج السلام .
عهود : حنان تعالي يمي ، ابا اقولج اش سووا فيني هالظالمين .
ومن سمعوا قمر وحلا كلام عهود ارتفعت ضحكاتهم عليها وحنان ما كنت تدري فيسلت يم اختها وتمت تسمع منها السالفه
عهود بعد ما كملت السالفه وهي تبجي : وهذي السالفه كلها وانا منقهره من اختج هذي الا انحازت ويه بنت خالتج اصلا آنه ادري لو كنت امي المرحومه موجوده ما خلت بنتها هذي تسوي فيني جديه .
حنان تألمت لاختها وخطر في بالها خطه جهنميه : عهود تعالي بقولج شلون بننتقم
، " وخبرت اختها اش بسوون من غير ما يسمعونهم حلا وقمر " اتفقنا ؟
عهود عيبتها الفكرة وايد : اتفقنا الحين اروح ايبه
نزلت عهود للمطبخ واخذت لها بيبسي وصعدت لهم ومن شافت حلا البيبسي " حلا كانت مدمنه بيبسي كان من الاشيا الرئيسيه الا تحبها "
حلا : قلبي عهود احسن وحده بتعطيني وياها بيبسي
عهود : صدقج تبين ، توج مب طايقتني ولا طايقه خلقتي والحين تبين من عندي .
حلا : يه كنت امزح وياج ، يعني انتي زعلتي ؟ يلا عطيني من البيبسي
عهود : متأكدة تبين ؟
حلا : هيه .
اخذت عهود البيبسي وكتته على حلا من فوقها لتحتها وخيست ثيابها وحالتها ، وهربت من غرفه اختها سريع علشان ما تصيدها حلا .
حلا ما عرفت شتسوي وكانت زعلانه موت عليها وقررت انها تنتقم منها مرة ثانيه .
حلا : الحين شسوي خيست ثيابي وحالتي وانا بعد اقل من ساعه بيني مايد اخويي ، شسوي اش هالفشله .
قمر : لا تحاتين انتي دخلي الحمام تسبحي وآنه باييب لج ثياب من عندي .

يتبع >>
السلام عليكم

@@@@@@@@@@@@
اليوم : الثلاثاء
الساعه : 07:45 مساءًا
المكان : بيت ميلس قوم بو بخيت ( بو علي )
@@@@@@@@@@@@


كانوا الشباب مايد وعلي وبخيت يالسين يهذرون .
( بخيت شاب ملتزم وبنفس الوقت طيب وحباب ومغرور وايد وبنيته ضخمه مثل اخوه ، اسمراني ومسوي له لحيه خفيفه ( رسمه اللحيه مب سكسوكة ) وعيونه واسع ونظراته دايمًا حادة مثل الصقر )
علي : يعني ماشي سبب محدد يمنعك من الزواج .
بخيت : لا ماشي سبب .. بس انا ناوي اصير سيد العزاب ، مينون قالوا لك اتزوج وابلش عمري بعوار راس.
مايد : هههههههه بس مب كلهم عوار راس البعض ، البعض تحسهم مصدر راحه وحنان وراحه لك .
بخيت : انا متنازل عن هالراحه ، انا برايي شي مب عندي وانا ابيه واتمناه ، احسن من شي عندي وانا ما ابيه .
مايد : اقول علي شكله اخوك موليه رايحه عليه ، عايف الحريم كلهم .
وهم قاعدين مرة وحده تطب عليهم اليازية بحشرتها وربشتها
( اليازية بنت ربشه وخبله شويء توها مخلصه ثانويه ادبي بس على قولها بتقعد سنه تريح في البيت وبعدها بتدش الجامعه ، اليازية ملامحها مثل اخوها بخيت ماخذه منه معظم صفاته بشرتها برونزيه وعيونها زجاجية واسعه وفيها غمازتين ويعني ملاينه شوي ( مب دبه ) وهذا الا مخلنها روعه )
اليازية تصرخ بصوت عالي : شتسووون
مايد : الناس تسلم وبعدين تصارخ وتحقق يا الخبله
اليازية : سلمنه ، يمه كلني بقشاري هذا ما تسوى علينه .
مايد : ردينه .
بخيت : وتبوني اتزوج بعد كافيني هالبلوه الي عندي تبوني ايب لي بلوه ثانيه .
علي : ههههه في هذي صدقت .
اليازية : اش عنه ترمسون ؟
علي : وانتي اش خصج ريايل يسولفون مابينهم وش دخل الحريم في سالفه .
مايد : لقافه وفراغه
بخيت : اتمنى انكم عرفتون بعد الي شفتوه سبب اضرابي عن الزواج ، ويعني مو تقولون مضرب لسبب فاضي .
مايد : بس مهما كان ، مب كل الحريم سوا ومب كل اصابع ايدك مثل بعضهم ، كاهي الرضيعه فديتها ماشي احسن منها .
اليازية تتليقف من يديد : ومنو هاي الرضيعه
بخيت : وانتي شخصج ، اذا ما عندج شغل قومي سوي لنا عصير ترانه ميتين عطش وفكينه من اسالتج السخيفة هاي .
تقوم اليازية وهي تتحرطم من المهمه الا كلفها اخوها بها ، وماتشوف الا التكية يايه على راسها " من اجرام علي " .
مايد : هههههه زين تسوي فيها .
اليازية : شنو زين تسوي فيها لا تخليني الحين ما سوي لك عصير انته واهو ، مو تظنوني هينه ، اذبحكم ومحد يدري
بخيت : والله ، اقول يالملقوفه روحي سوي العصير لا آنه الي اذبحج اليوم .
طلعت اليازية من الميلس وعلي ومايد يضحكون عليها وعلى خبالها .
بخيت : الا ما قلت لنه مايد منو تقصد بالرضيعه ؟
علي : هذا موول مايدري بالدنيا ، يقصد اخته حلا .
بخيت : يعني تبي تقنعني انا مافيها من خبال اليازية .
مايد : الصراحه ما في عليها ، صحيح عليها سوالف احيانا لكن اهي ماعليها كلام .
بخيت : هههههه الا يسمع رمستك يقول مب قاعد تمدح اختك قاعد تمدح حبيبتك .
مايد : تدري عاد ؟ سليمة جبتك .
بخيت : ومنو هذي سليمه .
علي : هذا واحد من الشباب الي معانه بالجامعه من البحرين وسمعناه اكثر من مرة يقول هذي للدكتور له سوو شي ( طبعا الدكتور انجليزي وماكان يفهم شالمعنى )
مايد : سالناه قال هذي ينيه ، وهم وايد يستخدمون هاي العبارة واحنه يعني مثل ما تعرف عيبتنه والي يعيبنه محد يقدر يمنعنه عنه .
>> يمكن تستغربون من وين يبت ( سليمة جبتك ) بس وياي وحده بالمسنجر من البحرين كل ماقول لها شيء تقولي سليمة جبتج ويوم سالتها كان هذا ردها <<
وبنهايه كلام مايد دخلت اليازية الميلس في ايدها العصير .
اليازية بلقافتها : منو هاي سليمة .
بخيت : هذي بنت معروفه بجمالها وحلاوتها ومثلج ولذلك اقولج من كل قلبي انج انتي سليمة .
اليازية تنش ببرائتها وتبوس اخوها : فديته اخوه دوم يطريني بالزين
ومن سمعوه الشباب وشافوا رده فعل اليازية ماتوا من الضحك ، ومسكينه اليازية ماتدري انه يقصد بها التشبية انها مثل الينانوه .
اليازية باستغراب : اش فيكم انتوا ليش تضحون جيه ، خرفتوا ؟
بخيت : ماعليج منهم هذول ، ميانين .
علي : تبيني اعلمها ليش نضحك يالعاجل ؟
مايد : هي ياخوك خلنه نفضحه علشان نشوف منو العاجل ومنو المينون .
بخيت : تكفون ، والله تكفون طلبتكم لا تقولون لها ، وانا اقولكم انا المينون وانتوا العجل ، بس تكفون لا تطيحوني في ايدها ما ودي انام الليله بالمقبره .
مايد وعلي يازعم يتشاورون شيحكمون عليه .
مايد : اش رايك علي ، نعفو عنه ؟
علي : شنو شنو نعفو عنه ، لا يبا ما نعفو عنه خله نفضحه علشان يتأدب ومايعودها مرة ثانيه .
مايد : دام هذا رايك انا موافق .
اليازية : شنو صاير شالي انت موافق عليه وهو مب موافق شسالفه اش صاير ؟
مايد : اقول بخيت .. نعلمها والا شلون ؟
بخيت : افا افا ولد العم تعلمها ، وانا الي اقول انته الريال الفاهم العاجل .
اليازية : ما عليكم منه وقولوا لي شسالفه .
علي : نبي الامان منه اول ، نخاف على اعمارنه يسوي فينه شي .
اليازية : آنا اعطيكم الامان ،"ومسكت ايد بخيت " انتوا قولوا كل شيء وانه اوعدكم انه ما يصير لكم شيء
بخيت : الله يسامحكم .
وبدى مايد يقول سالفه ( سليمه ) لليازية وكل مالها تزيد غيض على بخيت .
مايد : وهذي كل السالفه وانتي صدقتيه بعد ، وهو مسوي روحه اونه بريء .
علي : احنه خبرناج المفروض الحين تنتقمين لنا من هالحشرة الي اسمه بخيت .
اليازية : وهي تطق على صدرها ، لا تخافون بسويها الحين . اقول مايد ييب الطاسه المحطوطه هناك يمك على الطاوله ( الطاسة هذي غزيرة محطوط فيها باقي ورد على قدها ومب مثبته الباقه دايما ، يعني تقدر تشيلها وتحطها على راحتك ) .
مايد يطاولها الطاسه : تفضلي .
اخذت اليازية الطاسه وشلت الباقه منها وكتت العصير الا مسوتنه كامل فيها تقريبا غطاها كامل . وخلت مايد وعلي يمسكون ايادي بخيت علشان ما يتحرك واخذت راسه وقالت له : قول اسف .
بخيت : اسف بس ارجوج لا تسوينها فيني .
اليازية : الي يسوي شيء لازم يتجازى عليه وانت سويت شيء محد يسويه واحنه لازم بنعاقبك . عدل والا لا .
بسرعه ردوا عليها مايد وعلي خوفا من ان الدور يكون عليهم بعدها : : عدل ، كلامج كله صحيح ، والمجرم لازم ينال عقابه .
واخذت اليازية راس بخيت ونزلته بالطاسه ورفعته وكان حاله كلش مب شيء .
اليازية : تعودها مرة ثانيه ؟
بخيت : اسف ماي برنسس ، بس هديني .
اليازية : مب قادره اصدق رمستك مادري ليش احس انك تجذب علي .
واخذت راسه ونزلته بالطاسه مرة ثانيه وردت رفعته
بخيت : ارجوج ارحميني ، ما ابى اموت بعدني شباب .
اليازية : لا تخاف ما بذبحك بس بعلمك الاحترام شوي . واذا تبي ان هالعذاب يروح تلبي لي 3 مطالب .
مايد وهو يهمس : الظاهر صار المارد السحري واحنا ما ندري .
علي يرد بهمس على مايد : : اسكت لا تسمعك نروح فيها .
بخيت : امري الا تبينه بس خلصيني من هالعذاب
اليازية : اول طلب : اباك بكرا توديني السينما
بخيت : مقدور
اليازية : ثاني طلب : ايدك على 1200 درهم مب وايد .
بخيت فجج عويناته : اش تبين بهم ؟ ناويه تفلسيني
اليازية : شنو قلنه تبي تظل لها الحال لباجر ، لا تنسى انك انت الا قلت تبي نفج قيدك مب آنه الا قلت لك .
بخيت : اوكي سيدتي ، بس ريحني وقولي مطلبج الاخيري ترا احس ان روحي بتطلع بسبتج .
اليازية : الطلب الثالث والاخير : مب وايد صعب بس ابا اصورك بتلفوني جي واصورك فيديو وانته تشرب من العصير .
علي وهو ميود ضحكته بهمس : اونه الثور الاسود الا شفناه ذاك اليوم لما رحنه العزبة .
مايد : ولا على راسه دبانتين
بخيت : والله حرام ، خلاص ابي اموت .
اليازية : يزاك من قالك علشان مرة ثانيه ما تعودها ،>> ومن بعدها بدت اليازية بمخططها الحربي .

@@@@@@@@@@@@
اليوم : الثلاثاء
الساعة : 08:05
المكان : غرفة قمر في بيت بو حميد
@@@@@@@@@@@@

حلا كانت يدام التسريحة تسحي شعرها من بعد ما طلعت من الحمام وقمر راحت تيب لها هوت جوكليت تشربه ، كانت حلا قاعده تغني اغنيه وائل كفوري (بحبك انا كتير.. يا حبيبي ظلك طل عليي .. وعيني بكير .. غمرني والمس لي ايدي سنين بين ايدي .. انا شو مشتائ عليك .. يا حبيبي خلك ئلبك خليه يحملنا ونطير .. وينك يا حبيبي .. اشتئت لك كثير ارجع اشوفك حبيبي .. ما توئعت تصير.. فكرتك ناسيني وما بدك تحكيني يا سارئ حنيني ) وبها الوقت دش أحمد الغرفة كان يبي يكلم اخته قمر لكن من شاف حلا تيبس مكانه ، ظل يطالعها وعينه كانت البنيه الغامجة تلتلألأ وهو يشوف هذا المنظر وكانه شايف ملاك وظل يتقرب منها شوي شوي وخطوه خطوه للين ما وصل قريب منها رن موبايله التفت له حلا وتمت متصمنه مكانها مب عارفه شتسوي ، أحمد من سمع صوت تلفونه كأن احد كات عليه ماي بارد التفت لنفسه وهم يطلع من الغرفه .
احمد قبل ما يسكر الباب صد صوب حلا وابتسم : : حلا صوتج وايد حلو .
وسكر الباب وراه وترك اسأله وايد لحلا تفكر في اجابات لهم . شوي ووصلت قمر ومعاها الهوت جوكليت .
قمر : اش فيج حلا لحين ما خلصتي تسحي شعرج . يبي المشط بكمل انا وربطه لج .
حلا ومن غير ما تحس عطت المشط والربطه لقمر
وتمت قمر تمشط شعر حلا الي كانت في عالم غير عالمها تحس بشعور غريب وفي وبنفس الوقت تحس ان قلبها ينغزها من الي يصير ، وكانت بكل لحضه تتذكر الموقف وكانه ينعاد مثل الفلم ثانيه ورا ثانيه ودقيقه ورا دقيقه جدام عينها العسليه .
قمر وهي تدز حلا : وينج وين وصلتي يا بنت وانا الا صار لي ساعه ارمس وفي النهايه الاخت في كوكب اخر .
حلا : سوري ، بس ذكرت اخوي انه قايل بيني الساعه 8:30 فقلت اجهز وايلس انتظره احسن من انه ينتظرني .
قمر : مب قادره اصدقج ، بس راح احاول ، مع ان قلبي يقول ان في شيء صار لج بها العشر دقايق الا غبتهم عنج .
حلا تتنهد وفي داخلها تقول ماتدرين بالي احس به والي صار لي بس لو تعرفين بس شلون ما كنت احس بها الأحمد ، معقوله يكون الا في بالي ، لالا مب معقول .
وفي هاللحظة قطع صوت تلفونها وهو يرن على اغنيه ( اولي اولي جاي بعيد انا ، حكيلي حكيلي حكاية بغني أنا )
انتبهت والا مايد اخوها ع الخط شلت التلفون
حلا : هلا مايد

@@@@@@@@@@@@
اليوم : الثلاثاء
الساعه : 08:15
المكان : ميلس قووم بو بخيت
@@@@@@@@@@@@

بها الوقت كانوا مايد و علي واليازية في الميلس يسولفون ومايد واليازية يتحدون بعض في البلي ستيشن .
مايد : علي شوف اختك هاي تبي تسوي لنا احراج ، الحين تبي تتحدى وبعدين بتقعد تبجي من الهزيمة .
علي : هههههه عادي دومها جي .
اليازيه : مالت عليكم تتمصخرون علي انتوا الحين ، وانته ميود اول اعرف العب بعدين ارمس .
مايد : منشوف ، مثل ما يقولون الماي تجذب الغواص .
اليازية : مايد شوف شهناك ، يمه شنو هذا .
مايد رفع راسه يشوف اش صاير ماعرف انها حيله من اليازيه علشان تفوز عليه ، وسوتها قدرت تقضي عليه بالضربه القاضيه وخسر الجيم .
اليازية : هــــــي فزت عليه واخيرا فزت على هالمغرور
مايد : انتي وحده غشاشه ، العبي بشرف وشوفي شلون بتيج الهزيمة .
اليازية : من قال اني غشيت اصلا من قال لك ترفع راسك آنه شخصني فيك .
شوي والا يرن تلفون علي ، ساعتها تذكر مايد اخته حلا على الطلعه وقرر انته يتصل فيها .
شل مايد تلفونه وطلع بره يتصل لاخته .
علي مستغرب : وين بتروح ؟!
مايد : تذكرت انّي مواعد الرضيعه اني بطلع من جي ابي اتصل فيها اقول لها تجهز روحها علشان امرها .
وطلع برع علشان يتصل فيها ، رن التلفون شوي وشلته من بعدها حلا
حلا : هلا مايد
مايد : هلا حبيبتي ، شحالج ؟
حلا : تمام شحالك انت ؟
مايد : عال العال . اقول خلا برزي روحج انا بعد عشر دقايق ربع ساعه عندج ، مب تخليني انطرج سنه كامله .
حلا : اوكي حبيبي انتظرك
مايد : يلا تحملي فروحج ، مع السلامه
حلا : مع السلامه

سكر مايد من عند حلا ودش الميلس ، يرمس علي
مايد : اقوول علوي بتيي ويانه ؟
علي : وين ؟
مايد : بحوط الرضيعه تبي تروح تشتري لبنت خالتي هديه وبعدها بروح وياها السينما يقولون في فلم وايد حلو نازل .
علي : اوكي على خير بيي وياكم .
اليازية : بروح وياكم .
علي : وين تبين تيين ويانه ، ليش تبين ترزين فيسش فكل مكان ترا رزة
مامداه علي يكمل كلام دخل بخيت الميلس كان ساعتها صدق ( فول اوبشن ) كشخته كانت ما عليها لابس كندورا بيضا وسفره حمرا وطالع عجيب .
بخيت يكمل كلام علي : رزة الفيس من طبايع التيس
اليازية : الحين تشبهني انا بالتيس اهئ اهئ اهئ
علي : يكرم التيس اقله ذاك بهيمه مافيه عقل من اساس اما انتي الحمدلله والشكر .
مايد : بتيين ويانه عندج خمس دقايق تزهبين حالج فيهم واحنه ننتظر برع في الموتر ، اقول بخيت تيي ويانه ؟
بخيت : وين ؟
مايد : بنطلع بنتحوط وبنروح السينما حياك ويانه.
علي : ميود مو كأنك عزمت الديرة كلها ويانه على الطلعه
بخيت : يا اخي كيفه الريال مب عايبنك لا تيي ، وانا واحد بروح وحرة على قلبك ياثقيل .
علي : زين ، بس مو كانها صعبه ان كلنه نروح بموتر مايد ليش ما ننقسم بموترين الحين بطريجنه لبيت خالته بكون وياه بنفس الموتر وانت والاخت بموترك وبعدين يصيرون البنات وياك والا وياه وانا اشوف لي مكان .
مايد : اوكي عيل اتفقنا
بخيت : شنو بتخلوني ويه ذيج المينونه بروحي ناويين تذبحني .
بخيت ماكان داري ان اليازية وراه .
اليازية وهي تبحلس على بخيت : عنادًا فيك بيي وياك في الموتر وخلك تقول كلمه اسوي بك العذاب الا عذبتك اياه من ام ساعه وقد اعذر من انذر
بخيت خضع للامر وتجدم لموتره اهو واليازية وعلي ومايد ركبوا موتر مايد وساروا .


@@@@@@@@@@@@
اليوم : الثلاثاء
الساعة : 8:25 مساءا
المكان : غرفة قمر ، بيت بوحميد
@@@@@@@@@@@@

حلا كانت تتلبس وتهذر مع قمر بنفس الوقت ، تحاول تنسى الموقف الا صار لها لكن كل ما تبي تنساه يعود قلبها الصغير يذكرها فيه وهو يدق بالقو ومع كل نبضه كانت تسمع اسم أحمد وينعاد شريط أحداثها وياه .
قمر : ههههه يعني بعدج مصرة ما تخبريني شالي غيرج فجأة ؟
حلا : هههه ماودي اقول كيفي .
قمر : صج خقاقة
حلا خلصت تلبس ويلست تدور في الهاند باغ على غرشه العطر بس ما حصلتها ، عرفت انها ناسيتها وتوهقت اهي متعودة اذا تطلع تخلص غرشة العطر كامل عليها .
حلا : قموور طلبتج ، نسيت غرشة العطر في البيت ، اذا تسمحين يعني استخدم عطر من عندج .
قمر : بشرط تخبريني كل السالفه .
حلا : حرام عليج ،" وتقوم حلا تبوس خد قمر " فديتج بنت خالتي عطيني .
قمر : اول تخبريني السالفة ، ما عطيج قبل لا تخبريني
حلا : اوعدج اني اخبرج كل السالفه بكرا ، بس بليييز عطيني .
قمر : شنو بكرا ، بكرا بتتناسين
حلا : صدقيني بخبرج ، اوعدج .
قمر : انزين تبين عطر عربي لو فرنسي .
حلا : اي عطر ريحتها اكشخ .
قمر : والله مادري الاثنين حلوين
حلا : اوكي خل اجرب العربي تعرفين من زمان ماحط لي عربي ، تعودت على الفرنسي ، بنغير اليوم الستايل شويء.
قمر : شوفي على يمينج . صوب الصور الصغيرة ، في غرشه عطر مكتوب عليها دلوعة الخليج ، ريحته وايد روعه .
حلا : اخاف يطلع مب حلو ، على كفالتج ان روعه لو بس تبين تنتقمين .
قمر : مو جنج مصخيتها ؟ آنه قلت لج حلو يعني حلو .
حلا : اوكي اوكي برنسس بس مو تذبحيني .
ويلست حلا تحط لها من العطر ، مثل ما يقولون سبحت روحها من فوقها ، لتحتها بالغرشه الا يشمها يقول ما بقى شيء بالغرشه ، توها راده حلا غرشه العطر على التسريحة تدخل عهود الغرفة .
عهود : مب كانج خلصتي عطر خويتي ؟
حلا : كيفي انا وربيعتي نتياوز انتي شخصج ؟
عهود : اش خصني ؟ هذي خويتي وآنه الصراحة اخاف تخلينها تشهر افلاسها ، لابسه ملابسها ، متسحيه بمشطها ، متعطرة من عطرها .
حلا : قمر شوفي اختج مب جنها صايرة هاليومين وايد حشريه ؟
قمر : هاليومين بس ؟ اهي دومها جي .
وسط الحشرة الي قايمة رن تلفون حلا ، شافت ان المتصل اخوها شلت التلفون .
حلا : هلا مايد .
مايد : شنو تقولين ؟
حلا : اش قلت ، عهود خففي هذرتج ما اسمع مايد شيقول .
عهود : كيفي ما بخفف ، وواصلت عهودو تحرطمها .
مايد : الو ، الو .
مايد ما سمع شتقول حلا ، ونزل من الموتر وراح يم بيت خالته . وبنفس الوقت في الغرفه .
حلا : عهودو بلاسخافه وخليني انزل .
عهود : كيفي ما بخليج ، آنه في بيتي وآنه حرة
حلا : خوزي والا ما بتلومين الا نفسج .
وطلعت حلا من الغرفه وسوت لعهود طاف لانها ان وقفت زيادة ، بيعصب عليها اخوها .
حلا وقمر جسمهم من ورا مثل الشيء الي يشوفهم يمشون ما يميز ما بينهم . حلا كانت مسرعه ، والمميز ان كانت يفوح منها عطر قمر ، وبنفس الوقت أحمد كان طالع من غرفته بينزل تحت شافت حلا وظنها قمر وكان يبي ينتقم من قمر على الي سوه العصر فيه فبسرعه لحقها ومن غير ما تحس
أحمد : وهذا دين العصر .
أحمد دز حلا على انها قمر ، وحلا جسمها كلش هش اي دزة خفيفه تأثر فيها ،
حلا طاحت مرة وحده من على الدري ، أحمد كان منصدم ومتيبس مكانه مب عارف شيسوي ، كان المنظر كلش رهيب . ومرة وحده سمعوا كل الي في البيت صرخة مايد .
مايد : حلاااااااااااااااااااااااااااااااا
الكل طلع من الغرف ، وحتى بخيت و علي واليازية بسرعه دخلوا البيت يشوفون اش صاير . ولما دخلوا كلهم تيبسوا وانصدموا . كان أحمد يالس على الدري ودموعه البارده مثل اللآلي على خده الي رغم برودتها كانت يحسها مثل النار التي قاعده تحرق وتسعر خده مب مستوعب الي يصير ومايد صوب حلا الي كان الدم من حواليها وفاقده الوعي ،
مايد كان يبجي ويصارخ : حلا تكفين لا تروحين لا تروحين ، وفز من مكان لأحمد والشر يتطاير من عينه : انت السبب ، انت السبب .


.. نهاية الجزء الأول ..

شنو ممكن يصير مع حلا ؟

شنو راح يسوي مايد في أحمد ؟

شلون بتكون ردة فعل أم حلا وأبوها اذا دروا بالخبر ؟

وشنو توقعاتكم ؟

.. في انتظار تعليقاتكم وارائكم وانتقاداتكم ..

إلى اللقاء في الجزء القادم .. يوم الخميس القادم

شكـــــــــــــــــــرا


صعبة على القصه الجميله

وعلى القلم المبدع دومـــــــــــــأ

تقبلي فائق اعجابي بقلمك الراائع

القصة رورعة بس مابغيت أخلصها

مشكوره اختي صعبة المنال على القصه وااااااااااااايد روعه ويلا بسرعه نزلي الجزء ولا تتاخرين
تسلمين يا الغاليه

وينج صعبة المنال وين البقيه طولتي علينا
ننتظر التكمله

صبعة المنال يلا وين التكمله
طولتي