قدم بين ايديكم باقه من ورود الشاعر المبدع:.. ناصر بن دهيم
اول ورده ..
عـــــــــــــــــــــــــــرب
ودك من الدنيا تعيـش وخاطـرك ماهـو عليـل
لا ارتـاح بالـك ماغبطـت النـاس والاّ مالهـا
ودك كلام النـاس قـول الحـق بالشـي القليـل
وعند العرب ماغاب كلمـة حـق واللـي قالهـا
وانـا تحلويـت القصايـد حـزةٍ مـن كـل ليـل
لا جاتني انسى هلـي وانسـى البشـر وابقالهـا
يـوم القوافـي تتجـه كنهـا كمـا سيـلٍ يسيـل
حلفت مـا عـوّد ورى مـادام صـرت اقبالهـا
بنـات فكـري لا حصـل بالسالفـه قـالٍ وقيـل
جـنّـي وانــا هذبتـهـا ولبستـهـا موالـهـا
ومحلا شبوب النار والدلـه علـى جمـر المليـل
رسلان صفـرا مزعفـره والهيـل هـو يعبالهـا
في يّـد قـرمٍ لا عتـزا راغـة عيونـك يالذليـل
خفيـف جانـب دلـتـه مايشبـعـك فنجالـهـا
اسري وآسري هاجسـي كنـي عشيـقٍ لرحيـل
والليـل لامنـه سـرى الالغـاز ؟ مـن حلالهـا
وآسج فكري في البحر ميـلٍ بعـد ميـلٍ وميـل
وامـر بأمـواجٍ تلاطـم ينهبـل مــن جالـهـا
كنـي غريـبٍ ضيّـع دروبـه ولا فيـده دليـل
اعمـى بصـر والا البصيـره ميزتـه بلحالـهـا
وين الفهيم ابن الحمايل صاحب الهـرج الجزيـل
يفهم معـي كلمـة عتـب والنفـس مـن علالهـا
اخاوي الطيّب ولا لي في الردي قسـم وحصيـل
ومقـرد الخلـق آتعـوذ مـن غـثـا جهالـهـا
وانزه النفـس العزيـزه فـي سمـا جـوٍ عليـل
والحر لشقـر لا كفـخ وكـره بـروس جبالهـا
بشكي على اهل العرف واهل الحق من واقع هزيل
مشاكـلٍ مـن كـل صـوب وحالـةٍ يرثالـهـا
قلبت درج الطاولـه ولعّـت فـي نـاري فتيـل
ونـارٍ تشعلـل بالسـواد اشحاجتـي بشعالـهـا
شبوهـا بياعـة ضمايرهـم وجـحـادة جمـيـل
باعوا امـم لاجـل المصالـح قصّـر الله حبالهـا
ولو جاتـك الحيّـه تهـز الـراس تتمايـل بذيـل
ماظنها ترقـص طـرب والسـم يسـري بحالهـا
عرب نعم حنـا عـرب احـرار يزبنـا الدخيـل
اطهـر واشـرف امـة تسمـو بفعـل الرجالهـا
عـرب يشوفـون الجبـال بعينهـم حبـات هيـل
وشافوا النجوم انفوسهـم هيهـات مـن يرقالهـا
عـرب تعلـو واعتلـو ثـم اعدلـو دربٍ يميـل
الحـق مبـدأ بينهـم والصـدق رمـز اقولـهـا
عـرب طلـع منهـم نبـي الله يهـدي بالدلـيـل
الهاشمـي المصطفـى زال المنـاكـر زالـهـا
عمر وابو بكر وصلاح وخالـد السيـف السليـل
اهنا العرب يوم العـرب تفخـر بأفعـل ابطالهـا
الله وكبـر صـارت امجـاد الله عابـر سبـيـل
ذكرى تسطـر مجدهـا صعـب الزمـن يشتالهـا
كنا ثلاث حروف ؟ صـارن كالخيـال المستحيـل
واليـوم صرنـا عالـةٍ بيـن الامـم واحوالـهـا
ياجيل ياجيل الزمن اصحـى ونافـس كـل جيـل
وقلهـا وقـل ان الامـم تزهـا بكفـاح اجيالهـا
عسى ونرجع للكتاب ويرجـع السيـف الصقيـ
لوالسيـف وطـى روس كانـت بالسمـا لذيالهـا
ويالله تـعـز شيوخـنـا يالله يالـظـل الظلـيـل
اللـي علينـا فضلـهـم اسـودهـا واشبالـهـا
وانا قلبـت الطاولـه وريتهـا صاحـي وهبيـل
يـوم المهبـل غارقـه فـي نومهـا ومقايالـهـا
................
ثاني ورده ...
دروب الـــــهـــــجــــــر
لك وجه تسألني عسى عندي أخبار
يامدور دروب الهجـر والقطاعـه
أتشوفني مسجون وارموشك أسوار
في وسط عينك اتحـرى الشفاعـه
تايه وادور بين الاضلاع لـي دار
الحـب واحـد والخطايـا جماعـه
محتار في قربك وفالبعـد محتـار
مثل الرضيع اللي احرموه الرضاعه
ماعاد باقي لك من اعذارك اعـذار
عذرك ضعيف ومايسـر استماعـه
كنك تقـول بتطفـي النـار بالنـار
يالضايع اللي منخدع فـي ضياعـه
ياما فرشت القاع من تحتك ازهـار
الورد تحتك قـال سمـع وطاعـه
خليتني اترجـم احساسـي اشعـار
محلا غـلاك ونشوتـه واندفاعـه
احلى من الجلسه على شبـة النـار
في وسط روض( ن) زين الله قاعه
الصمت مايمشي على درب ثرثـار
والصدق ماتبنـي عليـه الاشاعـه
خلك على ماقيل ماضـي وتذكـار
بيـاع مثلـك قلبـي اليـوم باعـه
لاجيت ابرجع لك وكن شي ماصار
قمـت اتشـوق للقمـر وارتفاعـه
انا كذا مخلوق من خمسـة انهـار
حزن والم شعر وخيـال وشجاعـه
بيني وبين الحظ ممشـى ومشـوار
همي سنه وافـراح قلبـي ساعـه
..................
ثالث ورده....
الــــــصــــــراحـــــــه
الصبح شعشع واقبل النور بـالنور
والليل الاسود مايجيب الصراحـه
ماني بضايق لكن القلـب مقهـور
مثلي تساوت ضيقتـه وإنشراحـه
آمنت باللي ثبّت اطويق والطـور
عساه يلهمنـي ثبـوت وفصاحـه
واضح واحب اقابل الناس مسرور
مخلوق من بين الرضا والسماحـه
اكتب قصيدي همي إسعاد جمهور
ماهمني فوضه وصوره وساحـه
موجٍ تلاطم من ورى سبعة ابحور
حروف شعري للمخاليـق راحـه
يامبتليني ؟ بالحكي اسمع الشـور
لا تحسبنّك عايش بوسـط واحـه
اللي خلقنا ميّـز الحـق والـزور
الفرق واضح كالسمـا والبراحـه
الطب يبغاله مـن النـاس دكتـور
والهندسه تبغى ارتفـاع ومساحـه
ياللي تقول اني من الناس مغرور
ميّز همـاج المـا وميّـز قراحـه
لامن كبر راسي مع الطيش معذور
لكن غرور الشخص سبة مطاحـه
نسعى بـهالدنيا نبي الحال مستور
والمجتهد همـه وغمـه نجاحـه
ياصاحبي ؟ لا تقعد اتلّف واتـدور
الطير وشهو ؟ لو كسرنا جناحـه
منت بمعي يابن الاجاويد مجبـور
من راح مني سمّـح الله مراحـه
.....................
رابع ورده ...
بنت السحاب
المجد للـي غامـروا ماهـوب عنـد الخايفيـن
والسيف في يوم الوغى والمـوت مـن دلايلـه
أبرفـع عقالـي لكـم يالسابقـيـن المبدعـيـن
يامعشـر الشعـار ياباقـي الحـيـاه الزايـلـه
فلاسفه وأهل حكـم وأهـل غـزل ومزندقيـن
مـع صعاليـك الشـعـر كثـيـره وقلايـلـه
الـي متـى ياجيلنـا ناخـذ افـكـار الميتـيـن
قليـل منّـا مـن يصـوغ افكـاره وأصايـلـه
شف ألاراضي واسعه أضرب يسار أضرب يمين
وحـاول تشـوف المستقيمـه يارفيقـي مايلـه
تعقّـد وخلـك سهـل مابيـن نفسـك واليقيـن
كـم واحـدٍ خلـد حياتـه مـن كـلامٍ قايـلـه
خلك مع ماشي السكيك وصير مثـل المترفيـن
تـرى المطـر ماينـزل الا لا نشـت مخايلـه
بوابـةٍ فيهـا الفقـارى داخلـيـن وطالعـيـن
احدٍ هجوسـه ناضبـه واحـدٍ هجوسـه سايلـه
عالـم خيالـه واقعـي مايقبـل المستشعـريـن
ياللـي مـع خيـل القصيـد مسـرجٍ شلايـلـه
وقفت في يوم المطيـر أرفـع يدينـي والجبيـن
صوب السما لين المطر أرخـى علـيّ همايلـه
عليك يابنت المطـر راحـت حياتـي والسنيـن
مجمعٍ عـذب الغـرام وجيـت صوبـك شايلـه
أقسى من جروح الغرام الا خليط امـن الحنيـن
أبرد من الثلج ولك ادفى مـن سطـوع القايلـه
اطهر من دموع اليتامـا فـي حيـاة العاشقيـن
على عرابـات الهـوى والشـوق بـس آخايلـه
من جرب دموع الفرح لا جات من عين الحزين
يمكـن يحـس ان الغـلا مكـان محـدٍ طايلـه
عفوا تراني منشغل في ضعف جسمك والمتيـن
أرسم على الخصر الشفق و <...> بس آحايلـه
الكرسي وعيوني وأنا جينـاك نمشـي خطوتيـن
حنا وقفنـا مـن هنـا والنـاس جاتـك عايلـه
يمشي وراك الشمعدان وكـل خطـوه وردتيـن
الشوق ورىّ الزعفـران أشـوي مـن هوايلـه
بنت السحاب اخذي كتـابٍ ماقـروه الحاسديـن
من وين مارحتي تجيـك أوراق صمتـه حايلـه
اللـي بقالـي مـن حياتـك ياحياتـي دمعتيـن
زادت ادموعي فوقهـا الليـن صـارت عايلـه
بالعربـي لامـن ذكرتـك قلـت ياربـي تعيـن
حكايتـي ويـاك ياعـمـري حكـايـه هايـلـه
.........................
خامس ورده....
الطلع النضيد
منفي من الموضة وادور كل ما اشوفه جديـد
عكس الرواة وكل ما قالـوه اشبـاه الـرواه
قصيدتي هذي نتـاج الهـم واحـزان القصيـد
تبكي من اجرام الادب والشعر طايح مستواه
انا الغريب اللي قعدت هناك في الركن البعيـد
مثل العمى اللي علق آماله على مسكة عصاه
اذا الشتاء حول حياتـي كلهـا بـرد وجليـد
زقـارة الدخـان مزتهـا اترجعنـي مـيـاه
متثبـت مثـل الجبـل متقـوي مثـل الحديـد
متوكـل بالله علـى درب الكرامـة والغنـاه
متناثر مثل الهوى واخذ مـن انفاسـي واعيـد
اتبع هوى نفسي وكل انسان يمشي في هـواه
اصحابي لا صاروا مع العدوان خلوني وحيـد
ما عاد يغريني على الدنيا مكـان ولا اتجـاه
اصحابي العدوان شوفوا الدمع يتناثـر شهيـد
ادفن من دموعي امم واطلب من الله النجـاه
اطيب وادور رضاهم مـا لقيـت الا الجحيـد
احاول ابعد من مماشيهم وصارولي حصـاه
اكبر العقـل ولقيـت انـي افيـد ولا استفيـد
انسان ينزل لتواضع من سمـاه الـى سمـاه
مشاعر صارت لهب وتقول ياهل مـن مزيـد
وانا اضيق وما يوسع خاطـري الا الصـلاه
ياليتني ماني انا وياليـت مـا عنـدي رصيـد
دنياي هـذي كلهـا دنيـا المظاهـر بالحيـاه
اشلون اغير مجتمع مـا يسمـع آداب النشيـد
لازم اغير شاعر مسكيـن تايـه فـي غبـاه
ما دامها يا صاحبـي حكـام سـادات وعبيـد
اكبر غني بالمجتمع ياطي على باقي الرعـاه
النقص يمشي بالبني آدم كل مـا شفتـه يزيـد
كم واحد يمشي بهالدنيـا كـذا علـى عمـاه
لاشفتهم صاروا كذا برحل من الحزن الاكيـد
اسابق انجوم السما اصيح انـادي لـي فتـاه
راحت علي اغلى نساء الارض يا الحظ العنيد
مكانها صعب المنـال ودايـم تمشـي معـاه
اطول من اطراف النخيل الشامخات ام الجريد
قلبي لها مثل الوطن كنها تربى فـي حشـاه
ما تشرب الا الزعفران واكلها الطلع النضيـد
ما تمشي الا من على السندس ولا تلبس سواه
ما تمشي الا كبرياء الخيل في اليـوم الشديـد
فيها من اطباع الاصايل خجلتن مثـل المهـاه
كن الشوارع تستوي مـن مشيهـا ولا تحيـد
والورد من تحت القدم ولهان يعطيهـا شـذاه
ما كنها وسط الجهل الا كمـا الـراي السديـد
حبيبتي من كوكب الحلوين ما هي مـن وراه
ابنتظر في كل سكـة مـن محطـات الحديـد
ابترك آمالي على المينـا وابتحـرى عطـاه
ابنتظـر وابنتظـر الفـال والحـظ السعـيـد
اوجد حال اللي يجر الصوت ما يسمع صداه
شفني تنرفزت وكتبت آخر نتاجـك يالقصيـد
قصيدة تسوى جبال الطويق وجبـال السـراه
....................
اتمنى الباقه تنال على اعجابكم...
باقه من ورود الشاعر المبدع .. ناصر بن دهيم 
العرض العادي
